దానికోసం ఎన్నెన్ని ఎదురుచూపులు!

పెళ్లి! జీవితంలో ఓ మధుర ఘట్టం. ఓ మలుపు లగం. దానికోసం ఎన్నెన్ని ఎదురుచూపులు! ఎన్నేసి నిట్టూర్పులు! అన్నిటినీ కొనగోటితో.......................

మాయం చేయగల మంత్రదండం వివాహం. కొత్త బంధాలు, బంధుత్వాలను తోడు తీసుకొచ్చే వరం కూడా. అందుకేనేమో పెళ్లంటే...నూరేళ్ల పంట అంటారు. బెండకాయ ముదిరినా బ్రహ్మచారి ముదిరినా పనికిరారని తాతయ్యలు పరిహసిస్తుంటారు. ఆ విధంగా మనవళ్లను పెళ్లికి సిద్ధం చేస్తుంటారు. శీఘ్రమేవ కళ్యాణ ప్రాప్తిరస్తు అంటూ పడుచుపిల్లలను దీవిస్తుంటారు.

శ్రీరస్తు శుభమస్తు అంటూ శ్రీకారం చుట్టుకునేది పెళ్లి పుస్తకం. అలాగని పెళ్లంటే మూడు ముళ్లు- ఏడడుగులే కాదు. మొగుడు పిల్లలు మాత్రమే అనుకోకూడదు. కేవలం ఆస్తిపాస్తుల పెంపుకు ఏర్పరుచుకునే బంధం అంతకన్నా కాదు. పెళ్లంటే రెండు శరీరాలు కలవడం మాత్రమే కాదు. భిన్న వాతావరణాల్లో పెరిగి పెద్దయిన రెండు మనసులు కలిసి కాపురం చేయడం. తొలి చూపులో పుట్టిన ప్రేమను జీవితకాలంపాటు కాపాడుకోవడం. ఒకరినొకరు అర్ధంచేసుకుంటూ తోడూనీడలా బతకడం. ఒకళ్లకొకళ్లు భరోసా ఇచ్చుకోవడం. భాగస్వామి ఎదుగుదలకు సాయం చేయడం. ప్రేమతో పాటు నమ్మకాన్నీ ఇచ్చిపుచ్చుకోవడం. నూతన వధూవరులు ఆలుమగలై బంధాన్ని బలపర్చుకోవడం.... బాధ్యతలను నెరవేర్చడం..

మూడుముళ్లు వేసీవెయ్యకముందే సైన్యంలో చేరమని అధికారుల నుంచి పిలుపు వస్తే...కొత్తజంట పడే విరహం సినిమాల్లో చూస్తుంటాం. అయినప్పటికీ బాధ్యతగల జవానుగా కదనరంగంలో కాలూనడం చూసి కంటతడి పెడతాం. ఉద్యోగార్ధం పరాయిచోట శిక్షణకు వెళ్లడం చూస్తుంటాం. ఎడబాటును తోసిరాజని దేశం కోసం, కుటుంబం కోసం, మంచి భవిత కోసం వెళ్లడం చూస్తుంటాం. పెళ్లి అయ్యీ కాకముందే ఓటు వేయడానికి వెళ్లడంకూడా బాధ్యత నెరవేర్చడంలో భాగమే. ఓటు హక్కు వినియోగించుకొని తమకు నచ్చిన ప్రతినిధిని ఎంచుకోవడం ప్రతి పౌరుని బాధ్యత. ఆదిలాబాద్‌, మహబూబ్‌నగర్‌ జిల్లాలో ఓ రెండు జంటలు పెళ్లిబట్టలతో పీటలమీది నుంచి వెళ్లి ఓటేయడం అభినందనీయం. చదువుకు కాదు పెళ్లి ఆటంకం అని నిరూపించింది విశాఖ వనిత. పెళ్లయిన గంటకే పెళ్లిపందిరి నుంచి ఎకాఎకిన పరీక్షహాలుకు చేరుకుని ఇంటర్‌ పరీక్షలు రాసింది. హక్కులను సాధించుకుంటూ...బాధ్యతలను నెరవేర్చుకుంటూ నిండు నూరేళ్లు చేసే సహజీవనమే పెళ్లి.