'ఋషి' కమర్షియల్‌గా సక్సెస్ కాలేదు : రమేష్ ప్రసాద్

సినిమా రంగంలో సంపాదించిన సొమ్మంతా సినిమా రంగంలోనే పెట్టుబడులు పెట్టి, సినిమా రంగం మరింత సుసంపన్నం అయ్యేందుకు కృషి చేసిన అతి కొద్దిమంది విశిష్ట వ్యక్తుల్లో స్వర్గీయ ఎల్వీ.ప్రసాద్‌ ఒకరు. అంతేకాదు.............................................ఒక నిర్మాతగా, దర్శకుడుగా తను తీసిన చిత్రాల్ని, తను నటించిన చిత్రాల్ని ప్రజలు తండోపతండాలుగా చూడడం వల్ల మాత్రమే తను కోట్లకు పడగలెత్తగలిగినందున కంటిచూపు సమస్యలతో బాధపడే ప్రజలందరికీ ఉపయోగకరంగా ఉండాలనే ఉక్కు సంకల్పంతో తన పేరిట ఒక ఐ ఇన్‌స్టిట్యూట్‌ను, హాస్పిటల్‌ను నెలకొల్పిన మహా వ్యక్తి ఆయన. ఈరోజున మన దేశంలో పేరెన్నికగన్న కంటి ఆస్పత్రులలో ఎల్వీ.ప్రసాద్‌ ఐ ఇన్‌స్టిట్యూట్‌ది అగ్రస్థానం.

దేశం నలుమూలల నుంచి లక్షలాది మంది ఈ ఆస్పత్రికి వచ్చి కంటి సమస్యలకు ఉపశమనం పొందుతున్నారు. సినిమా రంగంలో మాత్రమే కాకుండా, సేవారంగంలోనూ తనకు తానే సాటి అనిపించుకున్న ఎల్వీ.ప్రసాద్‌ గారి ఘన వారసత్వాన్ని కొనసాగిస్తున్న వారి తనయుడు రమేష్‌ప్రసాద్‌ నిర్మించిన 'ఋషి' చిత్రం ఫిబ్రవరి 10న విడుదలైంది.

'ఇట్స్‌మై లవ్‌స్టోరీ' ఫేం అరవింద్‌కృష్ణ టైటిల్‌ పాత్రలో ప్రతిష్టాత్మక ప్రసాద్‌ ప్రొడక్షన్స్‌ పతాకంపై రాజ్‌ మాదిరాజ్‌ దర్శకత్వంలో రమేష్‌ప్రసాద్‌ నిర్మించిన 'ఋషి' అవార్డు సినిమాలా ఉందనే కామెంట్లు వచ్చాయి. ఈ సందర్భంగా 'ప్రసాద్‌' సంస్థల అధినేత, 'ఋషి' నిర్మాత రమేష్‌ప్రసాద్‌తో ఇంటర్వ్యూ..

* 'ఋషి' సినిమాకు లభిస్తున్న స్పందనపై ఎలా ఉంది?
మా ప్రసాద్‌ ప్రొడక్షన్స్‌కు ఉన్న పేరు ప్రతిష్టల గురించి అందరికీ తెలిసినవే. రెండున్నర దశాబ్దాల అనంతరం ప్రసాద్‌ ప్రొడక్షన్స్‌ నుంచి వస్తున్న చిత్రం దాని పేరు ప్రతిష్టలకు ఎట్టి పరిస్ధితుల్లో భంగం కలిగించకూడదన్నదే సిద్ధాంతంగా 'ఋషి' నిర్మాణానికి ఉపక్రమించాను. సినిమా విడుదలయ్యేంత వరకు ఆ విషయం గురించి మాత్రమే నేను టెన్షన్‌ పడుతూ వచ్చాను. అందువల్ల 'ఋషి' చిత్రానికి లభిస్తున్న పాజిటివ్‌ రెస్పాన్స్‌ మరియు ప్రశంసలు నాకెంతో సంతోషాన్ని కలిగిస్తున్నాయి. 'ఋషి' సినిమా చూస్తున్న వారంతా చాలారోజుల తర్వాత చాలా మంచి మంచి సినిమా చూశాం అని చెబుతుంటే చాలా గర్వంగా వుంది. 'ఋషి' చిత్రం సాధిస్తున్న అతి పెద్ద విజయంగా దీనిని భావిస్తున్నాం.

* భారీ బడ్జెట్‌ సినిమా తీయగలిగే వీలున్నప్పటికీ... మీరెందుకు ఆ ప్రయత్నం చేయలేదు?
ప్రసాద్‌ ప్రొడక్షన్స్‌ ఎప్పుడూ కథాబలానికే తప్ప, తారాగణానికి ప్రాధాన్యతనివ్వలేదు. అందువల్ల నేను కూడా అదే ఒరవడిని కొనసాగిస్తూ మంచి కథను ఎంపిక చేసుకుని కథనుబట్టి నటీనటులను తీసుకోవడం జరిగింది.

* 'ఋషి' విజయంలో ప్రధాన పాత్ర పోషిస్తున్న అంశాలేమిటని మీరు భావిస్తున్నారు?
రాజ్‌ మాదిరాజు దర్శకత్వ ప్రతిభ నటీనటుల అభినయం, స్నిగ్ధ - డాన్‌ చంద్రన్‌ల సంగీతం 'ఋషి' విజయంలో ముఖ్య పాత్ర పోషిస్తున్నాయి. రొటీన్‌ సబ్జెక్ట్స్‌కు భిన్నంగా మేము ఎంచుకున్న కథ, దానిని నడిపించిన విధానం ప్రేక్షకుల్ని అమితంగా ఆకట్టుకుంటున్నాయి.

* ప్రసాద్‌ ప్రొడక్షన్స్‌ తదుపరి చిత్రాలేమిటి?
ప్రస్తుతానికైతే ఇంకా ఏవీ ఫైనలైజ్‌ కాలేదు. జస్ట్‌ డిస్కషన్స్‌ స్టేజిలో వున్నాయి.

* ఇన్నేళ్ళుగా నిర్మాణంలో దూరంగా ఉండడాన్ని మీరెలా సమర్ధించుకుంటారు?
అసలు సమర్థించుకోవడం లేదు. ఇన్నేళ్ళు అన్నీ చేతిలో ఉండి కూడా సినిమా నిర్మాణానికి దూరంగా ఉండడం నేను చేసిన తప్పేనని ఒప్పుకోవడానికి నేనేమాత్రం నామోషిగా ఫీలవ్వను. ఇప్పుడున్న పరిస్ధితుల్లో విలువలకు, పద్ధతులకు కట్టుబడి సినిమాలు తీయడం నా వల్ల కాదనుకుని ఇన్నాళ్ళు సినిమా నిర్మాణానికి దూరంగా ఉండిపోయాను. కానీ మన విలువలు మనం కాపాడుకుంటూనే మారుతున్న పరిస్థితులతో పాటు మనమూ మారి, జయాపజయాలకు అతీతంగా సినిమా నిర్మాణాన్ని కొనసాగించి ఉండాల్సిందని ఇప్పుడు అనిపిస్తోంది. అందుకే ఇకపై మా బ్యానర్‌ నుంచి రెగ్యులర్‌గా సినిమాలు వస్తాయి.

* ఈ చిత్రం కమర్షియల్‌ హిట్‌కాదని తెలిసి ఎలా తీయగలిగారు?
ఇంతకుముందు చెప్పినట్లే.... మంచి సినిమా తీయాలని కథ కోసం చాలాసార్లు ఎదురు చూశాం. అవయవ దానం అనేది ప్రధాన అంశం. ఈ చిత్రం రిలీజ్‌ తర్వాత మేము నెలకొల్పిన ఫౌండేషన్‌కు చాలామంచి స్పందన వచ్చింది. ఈ విధంగా సక్సెస్‌ అయ్యాయి. ఇకపోతే కమర్షియల్‌గా వసూలుకాక పోయినా... ప్రేక్షకుల గుండెల్లో ఉండే చిత్రమైనందుకు ఆనందంగా ఉంది.