'నాతి చరామి' అంటూ జీలకర్ర, బెల్లం పెడితే... మూడు ముళ్లు వేస్తే... ఏడడుగులు నడిస్తే... తలంబ్రాలు పోసుకుంటే చాలు అమ్మాయి అప్పటిదాకా కనీపెంచిన............................కావేరి పెళ్లై పదేళ్లు. కానీ జరిగిన అనుభవాలు జీవితానికి సరిపడినంత! మధ్య తరగతి కుటుంబంలోంచి వచ్చిన కావేరికి పెద్ద ఆశలేమీ లేవు. అందుకు తగ్గట్లే ఆమె తల్లిదండ్రులూ సంబంధాలు వెతికారు. ఉన్నంతలో తగిన సంబంధం అనుకున్న సతీష్‌నిచ్చి వివాహంచేశారు. సతీష్‌ పెద్ద సంపాదనపరుడు కాడు. అలాగని, ఇల్లు నడపలేని వాడూ కాదు. పాలకుల పుణ్యమాని మంచినీళ్లు కూడా దొరకని ప్రాంతాల్లో మందు విరివిగా పారుతుందనేది అందరికీ తెలిసిన సత్యమే. ఆ సత్యాన్నే సతీష్‌ నమ్మాడు. మంచినీళ్లకన్నా మందుతోనే రోజులు వెళ్లబుచ్చాలనుకున్నాడు. ఇంకేముంది? సంపాదన మొత్తం దానికే సరిపోతోంది. భర్త తాగినా, ఆ మైకంలో కారుకూతలు కూసినా, ఎముకలు విరిగేలా కొట్టినా కిమ్మనకూడదన్న తల్లిదండ్రుల మాటను కావేరి పాటించింది. అందుకే మౌనంగా ఏడవడం ఎలాగో ఆమెకు ఎవరూ చెప్పనక్కర్లేదు.
ఇద్దరు పిల్లలు పుట్టినంత మాత్రాన బాధ్యతలు తెలుస్తాయనుకోవడం... బుద్ధిగా మసలుకుంటాడనుకోవడం భ్రమ అనే విషయం కావేరికి తొందర్లోనే తెలిసింది. భర్త మారడన్నది నిశ్చయం. కానీ పిల్లలముందే భర్త తాగి దొర్లడం, నానా బూతులు తిట్టడం, కొట్టడం... వీటిని కావేరి సహించలేకపోయింది. ఏ తల్లికైనా పిల్లల గురించే ఆలోచన. కావేరి మనసూ అందుకే తల్లడిల్లింది. ఎదిగే పిల్లల మనసుల్లో ఇవన్నీ చెడు ప్రభావాన్ని చూపుతాయి. కనుక దయచేసి పిల్లల ఎదుట సక్రమంగా ప్రవర్తించమని సతీష్‌ను వేడుకుంది. తాగితే మైకం మెదడుకు ఎక్కడమే కాదు, తోలు మందమవుతుందని సతీష్‌ ద్వారానే తెలిసింది కావేరికి. ఆమె వేదన సతీష్‌ మనసుకు ఎక్కలేదు సరికదా అతని ఆగడాలు మరింత ఎక్కువయ్యాయి.
ఆ సమస్యలు చాలవన్నట్లు కావేరి ఫోన్‌కు గుర్తు తెలియని ఫోన్లు వచ్చేవి. ఎవరో ఆకతాయి నోటికొచ్చినట్లు వాగేవాడు. అది చూసి సతీష్‌ వాడ్ని పెళ్లి చేసుకుంటావా అంటూ విపరీతంగా కొట్టాడు. నీకు పిల్లల్ని దూరం చేస్తానుండు అంటూ పిల్లల్ని హాస్టల్‌లో చేర్చాడు. అసలే మానసికంగా అలసిపోయిన కావేరి దీన్ని తట్టుకోలేకపోయింది. ఇక ఓరోజు పిల్లల్ని తీసుకుని వేరుగా వెళ్లిపోయింది. ఓ ఇల్లు అద్దెకు తీసుకుని తనకున్న చిరుద్యోగంతోనే పిల్లల్ని పెంచసాగింది.
ఓరోజు కావేరి కూతురు తండ్రిని చూడటానికి వెళ్లింది. అప్పుడు సతీష్‌, 'మీ అమ్మ ఎవడితోనో గడపడానికి నిన్ను ఇక్కడికి పంపింది' అంటూ అవాకులు చెవాకులు వాగాడు. దాంతో కూతురు కావేరి దగ్గరికి ఏడ్చుకుంటూ వచ్చింది. ఇదీ సంగతని చెప్పి బోరుమంది. ఏ పిల్లల ఆలోచన, ఎదుగుదల సరిగ్గా ఉండాలని తను ఇంత దూరం వచ్చిందో, ఆ పిల్లల మనసుల్లో భర్త జొప్పిస్తున్న అపాయకరమైన ఆలోచనలు కావేరిని భయపెట్టాయి. పోన్లే కదాని ఊరుకుంటే సతీష్‌ మరింత రెచ్చిపోతున్నాడని భావించింది.
తన భర్తకు బుద్ధిచెప్పాలంటే 'ఐద్వా లీగల్‌సెల్‌' ఒక్కటే మార్గమనుకున్న కావేరి వెంటనే అక్కడికొచ్చింది. తనకు భర్తతో కలిసి జీవించాలని లేదనీ... తమ మానాన తమను వదిలేస్తే పిల్లలను శుభ్రంగా పెంచుకుంటానని చెప్పింది. సభ్యులు సతీష్‌ను పిలిపించారు. 'ఎంతటి కసాయివాడైనా సరే తన పిల్లల క్షేమం కోరతాడు. కానీ నువ్వు ఇంత క్రూరంగా నీ కూతురి దగ్గరే నానామాటలు మాట్లాడుతున్నావు. స్వచ్ఛంగా ఉండే పిల్లల మనసులను కలుషితం చేసి ఏం బావుకోవాలనుకుంటున్నావు? నీ మీద ఆధారపడకుండా కావేరి తన బతుకేదో తాను బతుకుతోంది. నువ్వు చూడాల్సిన బాధ్యతలను తాను నెత్తిన వేసుకుని కష్టపడుతోంది. అయినా నువ్వు ఇంకా వాళ్లమీద విషం చిమ్మాలని చూస్తున్నావు. వారికి మనశ్శాంతి లేకుండా చేయాలని తప్పుడు మార్గాలు అన్వేషిస్తున్నావు. ఈ పద్ధతి సరిగ్గా లేదు. నీ పద్ధతిలో మార్పురాకుంటే ఏం చేయాలన్నది మాకు తెలుసు' అని సభ్యులు గట్టిగా చెప్పారు.
ఇంతవరకూ కావేరికి ఎవరూ లేరన్నదే సతీష్‌ ధైర్యం. కానీ ఇప్పుడు కావేరికి ఒక అండ దొరికిందని సతీష్‌కు అర్థమైంది. తాను ఎప్పట్లా తోకజాడిస్తే ఐద్వా సభ్యులు కత్తిరిస్తారన్నదీ అర్థమైంది. అప్పటినుండీ కావేరికి సతీష్‌ బెడద లేదు. పిల్లలను చదివించుకుంటూ కావేరి తన దారిన తాను బతుకుతోంది. 
No comments:
Post a Comment